JARVIS AI

Редакция 1.1

Официальным является текст на узбекском языке.

OMMAVIY OFERTA

Jarvis AI Sales xizmatini ko'rsatish shartnomasi

Tahrir: 1.1 (06.11.2026) · Saytga joylangan kundan kuchga kiradi · Manzil: jarvisai.uz/oferta

1. Umumiy qoidalar

1.1. Ushbu hujjat "JARVIS" mas'uliyati cheklangan jamiyati (STIR 311241200, manzil: Toshkent shahri, Yunusobod tumani, Minor MFY, Markaz-6 mavzesi, 70-uy; keyingi o'rinlarda "Ijrochi") tomonidan Jarvis AI Sales xizmatini (keyingi o'rinlarda "Xizmat") ushbu shartlarda olishni istagan har qanday shaxsga qaratilgan ommaviy ofertadir (O'zbekiston Respublikasi Fuqarolik kodeksining 369-moddasi ikkinchi qismi).

1.2. Oferta shartnomaning barcha muhim shartlarini o'z ichiga oladi (Fuqarolik kodeksining 367-moddasi) va O'zbekiston Respublikasining "Elektron tijorat to'g'risida"gi Qonuni (O'RQ-792, 29.09.2022) 16-moddasi talablariga muvofiq elektron hujjat shaklida tuzilgan.

1.3. Ushbu shartnoma haq evaziga xizmat ko'rsatish shartnomasidir (Fuqarolik kodeksining 703-moddasi). Xizmat "Elektron tijorat to'g'risida"gi Qonunning 3-moddasi ma'nosidagi raqamli xizmatdir: u moddiy natijasiz, elektron axborot muhitida ko'rsatiladi.

1.4. Xizmat faqat tadbirkorlik faoliyati uchun ko'rsatiladi. Mijoz bo'lib faqat yuridik shaxslar va yakka tartibdagi tadbirkorlar (keyingi o'rinlarda "Mijoz") o'z sotuv bo'limi ishini tahlil qilish uchun shartnoma tuzadi. Mijoz Xizmatni shaxsiy, oilaviy yoki uy-ro'zg'or ehtiyojlari uchun sotib olmaydi.

2. Shartnoma qanday tuziladi (aksept)

2.1. Aksept ikki harakatdan iborat:

  1. Mijoz to'lov sahifasida "Ommaviy oferta shartlarini o'qidim va to'liq qabul qilaman" belgisini qo'yadi;
  2. Mijoz to'lovni amalga oshiradi.

Belgi qo'yilmasa, to'lov tugmasi ishlamaydi. To'lov — oferta shartlarini bajarish bo'yicha harakat bo'lib, aksept hisoblanadi (Fuqarolik kodeksining 370-moddasi to'rtinchi qismi; "Elektron tijorat to'g'risida"gi Qonunning 19-moddasi).

2.2. Aksept to'liq va so'zsiz bo'lishi kerak (Fuqarolik kodeksining 370-moddasi ikkinchi qismi). Ofertani o'zgartirilgan shartlarda qabul qilib bo'lmaydi. Boshqa shartlarda ishlashni istagan Mijoz Ijrochi bilan alohida yozma shartnoma tuzadi.

2.3. Shartnoma Ijrochi to'lovni olgan paytda tuzilgan hisoblanadi (Fuqarolik kodeksining 365-moddasi; "Elektron tijorat to'g'risida"gi Qonunning 19-moddasi). Shartnoma yozma shaklda tuzilgan hisoblanadi (Fuqarolik kodeksining 366-moddasi beshinchi qismi). Qog'ozda imzolash talab qilinmaydi. Elektron hujjat va xabarlar qo'lda imzolangan qog'oz hujjatga tenglashtiriladi ("Elektron tijorat to'g'risida"gi Qonunning 15-moddasi).

2.4. Aksept qaytarib olinadi faqat aksept qaytarib olingani haqidagi xabar Ijrochiga aksept bilan bir vaqtda yoki undan oldin yetib kelsa (Fuqarolik kodeksining 371-moddasi). Belgi qo'yilib, to'lov qilinganidan keyin aksept qaytarib olinmaydi. To'lovgacha Mijoz istalgan paytda to'lov sahifasini yopib, shartnoma tuzishdan voz kechishi mumkin.

2.5. Ijrochi aksept sanasi va vaqtini, oferta tahririni, Mijoz akkauntini va to'lov raqamini saqlaydi. Bu yozuvlar, to'lov tizimi cheki va bank ko'chirmasi shartnoma tuzilganini tasdiqlaydi ("Elektron tijorat to'g'risida"gi Qonunning 20-moddasi) va nizo bo'lganda dalil bo'ladi.

3. Atamalar

  • Xizmat — Mijozning telefon qo'ng'iroqlari yozuvlarini sun'iy intellekt yordamida matnga aylantirish, tahlil qilish, baholash va hisobot berish uchun onlayn platforma (app.jarvisai.uz).
  • Tahlil soati — Xizmatning hisob birligi. 1 tahlil soati = 60 daqiqa tahlil qilingan qo'ng'iroq.
  • Balans — Mijoz to'lagan va hali ishlatilmagan tahlil daqiqalari.
  • Tarif — Xizmat narxlari va shartlari to'plami (Pro, Enterprise).

4. Xizmat va uning narxi

4.1. Xizmat narxi tahlil soati uchun belgilanadi:

  • Pro — 1 tahlil soati uchun 20 000 so'm;
  • Enterprise — 1 tahlil soati uchun 30 000 so'm.

4.2. Amaldagi narxlar jarvisai.uz saytida e'lon qilinadi. Mijoz to'lov paytida amalda bo'lgan narxni to'laydi.

4.3. Ijrochi narxlarni o'zgartirishi mumkin. Yangi narx faqat o'zgarishdan keyin qilingan to'lovlarga qo'llanadi. Avval sotib olingan soatlar eski narxda saqlanadi.

4.4. Xizmatni ulash va sozlash (o'rnatish) alohida haq evaziga bajariladi. Uning narxi va hajmi Mijoz bilan alohida kelishiladi.

5. Daqiqalar qanday hisoblanadi

5.1. Faqat muvaffaqiyatli tahlil qilingan qo'ng'iroq uchun daqiqa yechiladi. Tahlil muvaffaqiyatli bo'lishi uchun qo'ng'iroq matnga aylantirilgan va tahlil natijasi Mijoz kabinetida ko'rinadigan bo'lishi kerak.

5.2. Har bir qo'ng'iroqning davomiyligi to'liq daqiqaga yuqoriga yaxlitlanadi. Masalan: 1 daqiqa 01 soniyalik qo'ng'iroq uchun 2 daqiqa yechiladi.

5.3. Tahlil qilingan har bir qo'ng'iroq uchun kamida 1 daqiqa yechiladi.

5.4. 30 soniyadan qisqa qo'ng'iroqlar tahlil qilinmaydi va ular uchun daqiqa yechilmaydi.

5.5. Agar qo'ng'iroq Ijrochi tomonidagi texnik xato tufayli tahlil qilinmasa, u uchun daqiqa yechilmaydi.

5.6. Qo'ng'iroqning davomiyligi Mijozning telefoniya yoki CRM tizimi bergan ma'lumot bo'yicha olinadi.

6. To'lov va Xizmatni berish

6.1. To'lov 100% oldindan, o'zbek so'mida, saytdagi to'lov tizimi (Multicard) orqali amalga oshiriladi.

6.2. Mijoz qancha tahlil soati sotib olishini o'zi tanlaydi. To'lov tasdiqlangandan keyin soatlar darhol balansga tushadi va Xizmat Mijoz kabinetida foydalanish uchun ochiladi. Shu paytdan Xizmat Mijozga taqdim etilgan hisoblanadi.

6.3. Sotib olingan soatlar to'lov kunidan boshlab 30 kalendar kun amal qiladi. Shu muddat ichida ishlatilmagan soatlar muddat tugagach kuyadi va keyingi davrga o'tkazilmaydi.

6.4. Bank va to'lov tizimi komissiyalari Mijoz zimmasida.

7. To'langan pul qaytarilmaydi

7.1. Xizmat raqamli xizmatdir. To'lov qilingan zahoti Xizmat Mijozga ochiladi va uning uchun tahlil quvvati band qilinadi. Shu sababli to'langan pul hech qanday holatda pul shaklida Mijozga qaytarilmaydi. Mijoz belgi qo'yish va to'lov qilish bilan bu shartga roziligini tasdiqlaydi.

7.2. Mijoz shartnomadan istalgan paytda voz kechishi mumkin. Bunda u Xizmat narxini to'liq to'lashi shart (Fuqarolik kodeksining 707-moddasi birinchi qismi). Narx oldindan to'liq to'langani uchun voz kechilganda to'langan summa qaytarilmaydi. Xizmatni ko'rsatish Mijoz tomonidagi sabab bilan imkonsiz bo'lsa ham, Xizmat narxi to'liq to'lanadi (Fuqarolik kodeksining 705-moddasi ikkinchi qismi).

7.3. Xususan, pul quyidagi holatlarda ham qaytarilmaydi:

  1. Soatlar ishlatilmagan yoki to'liq ishlatilmagan bo'lsa. Masalan, 25 soat sotib olingan, 10 soati ishlatilgan bo'lsa, qolgan 15 soat uchun pul qaytarilmaydi.

  2. Soatlarning 30 kunlik muddati tugagan bo'lsa. Kuygan soatlar uchun pul ham, yangi soat ham berilmaydi.

  3. Mijoz fikridan qaytgan yoki Xizmatdan foydalanishni to'xtatgan bo'lsa. Bunga xodimlar ishdan ketgani, sotuv bo'limi yopilgani yoki boshqa tizimga o'tilgani ham kiradi.

  4. Mijoz tahlil natijasi, baholar yoki tavsiyalardan qoniqmagan bo'lsa. Sun'iy intellekt xulosalari yordamchi ma'lumot hisoblanadi. 5.1-bandda aytilganidek, tahlil qilingan qo'ng'iroq bo'yicha Xizmat ko'rsatilgan hisoblanadi.

  5. Qo'ng'iroq yozuvining sifati past bo'lsa. Masalan, shovqin, ovoz pastligi yoki bir necha kishi bir vaqtda gapirgani sababli natija kutilganidek chiqmasa ham pul qaytarilmaydi.

  6. Muammo Mijoz tomonida bo'lsa. Masalan, Mijozning telefoniyasi, CRM tizimi yoki integratsiyasi ishlamasa, kalit yoki parol o'zgartirilsa, ulanish uzib qo'yilsa, yozuvlar saqlanmasa.

  7. Mijoz noto'g'ri tarif yoki ortiqcha soat sotib olgan bo'lsa.

  8. Mijoz bir to'lovni xato bilan ikki marta qilgan bo'lsa. Ortiqcha to'langan summa pul bilan qaytarilmaydi. Uning o'rniga Ijrochi shu summaga teng tahlil soatlarini balansga qo'shadi; ularning 30 kunlik muddati qo'shilgan kundan boshlanadi.

  9. Mijozning akkaunti 10-bandda ko'rsatilgan qoidabuzarlik uchun to'xtatilgan bo'lsa.

  10. Narx keyinchalik pasaygan yoki yangi chegirma e'lon qilingan bo'lsa.

  11. Ulash va sozlash (o'rnatish) ishi boshlangan bo'lsa. O'rnatish uchun to'langan haq ham qaytarilmaydi.

7.4. Ijrochi aybi bilan Xizmat ishlamay qolsa, Ijrochi pulni emas, quyidagi kompensatsiyani beradi:

  • Ijrochi xatosi tufayli tahlil qilinmagan qo'ng'iroqlar uchun daqiqa yechilmaydi (5.5-band);
  • Xizmat Ijrochi aybi bilan ketma-ket 24 soatdan ko'p ishlamasa, soatlarning amal qilish muddati shu to'xtalish vaqtiga uzaytiriladi;
  • Ijrochi xatosi bilan noto'g'ri yechilgan daqiqalar tekshiruvdan keyin balansga qaytariladi.

7.5. Kompensatsiya olish uchun Mijoz muammo yuz bergan kundan boshlab 7 kalendar kun ichida 11-bandda ko'rsatilgan manzilga yozishi kerak. Ijrochi murojaatni 5 ish kuni ichida ko'rib chiqadi.

8. Tomonlarning majburiyatlari

8.1. Ijrochi:

  • Xizmatni ushbu shartlarda ko'rsatadi;
  • tahlil qilingan qo'ng'iroqlar, yechilgan daqiqalar va qolgan balansni Mijoz kabinetida ko'rsatib boradi;
  • Mijoz ma'lumotlarini maxfiy saqlaydi. Ma'lumotlar maxfiylik siyosati (jarvis.uz/privacy) bo'yicha qayta ishlanadi.

8.2. Mijoz:

  • qo'ng'iroqlarni yozib olish va ularni tahlil uchun uchinchi tomonga berish uchun qonun talab qiladigan barcha roziliklarni (shu jumladan, xodimlari va mijozlarining roziligini) o'zi oladi va bunga o'zi javob beradi;
  • kirish ma'lumotlarini (login, parol, kalitlar) boshqalarga bermaydi;
  • Xizmatdan qonunga zid maqsadlarda foydalanmaydi.

9. Javobgarlik

9.1. Sun'iy intellekt tahlili ehtimollikka asoslanadi va xato bo'lishi mumkin. Mijoz tahlil natijasi asosida qabul qilgan qarorlar (masalan, xodimni jazolash yoki ishdan bo'shatish) uchun o'zi javob beradi.

9.2. Tomonlar Fuqarolik kodeksining 332-moddasiga muvofiq Ijrochi javobgarligini cheklashga kelishadilar: Ijrochining javobgarligi har qanday holatda Mijoz oxirgi 30 kun ichida Xizmat uchun to'lagan summa bilan cheklanadi va 7.4-bandda ko'rsatilgan kompensatsiya shaklida beriladi. Bu cheklov Ijrochi majburiyatni qasddan buzgan holatga qo'llanmaydi (Fuqarolik kodeksining 333-moddasi).

9.3. Tomonlar o'z irodasiga bog'liq bo'lmagan holatlar (fors-major) uchun javob bermaydi. Bunga internet, elektr yoki tashqi provayderlarning yirik uzilishlari, davlat organlarining qarorlari va shunga o'xshash holatlar kiradi.

10. Akkauntni to'xtatish

Ijrochi quyidagi holatlarda Mijoz akkauntini ogohlantirib yoki ogohlantirmasdan to'xtatishi mumkin:

  • Mijoz 8.2-banddagi majburiyatlarni buzsa;
  • Xizmatga hujum qilsa yoki uni buzishga harakat qilsa;
  • to'lov firibgarlik yo'li bilan qilingan bo'lsa.

Bu holatda balansdagi soatlar va to'langan pul qaytarilmaydi.

11. Murojaat va nizolar

11.1. Murojaatlar uchun: info@jarvisai.uz · +998 77 017 99 77 · Telegram @jarvisuz_support_bot.

11.2. Nizolar avval muzokara yo'li bilan hal qilinadi. Murojaatga javob berish muddati 10 ish kuni. Kelishuvga erishilmasa, nizo Ijrochi joylashgan yerdagi iqtisodiy sudda O'zbekiston Respublikasi qonunlariga muvofiq ko'riladi.

12. Ofertani o'zgartirish

12.1. Ijrochi ofertaga o'zgartirish kiritishi mumkin. Yangi tahrir saytga joylangan kundan boshlab kuchga kiradi va undan keyin qilingan to'lovlarga qo'llanadi.

12.2. Avvalgi to'lovlarga ular qilingan paytdagi tahrir qo'llanadi. Har bir tahrir sanasi va raqami bilan saytda saqlanadi.

13. Ijrochi rekvizitlari

"JARVIS" MCHJ STIR: 311241200 · IFUT: 62010 Manzil: Toshkent shahri, Yunusobod tumani, Minor MFY, Markaz-6 mavzesi, 70-uy H/r: 20208000707041154001 · Bank: Milliy bank Yunusobod filiali · MFO: 00450 Tel: +998 77 017 99 77 · E-mail: info@jarvisai.uz